श्री बाल जीवन ज्योति माध्यमिक विद्यालय

"आदरणीय अभिभावक, शिक्षक-शिक्षिका ज्युहरु,प्यारा विद्यार्थी भाइबहिनीहरू, स्थानीय शिक्षाप्रेमी, युवा तथा बुज्रुक सामाजिक व्यक्तित्वहरू! साथै विद्यालय स्थापना कालका ती अग्रज ऐतिहासिक व्यक्तित्वहरू तथा उहाँका परिवारजनहरु, विभिन्न कालखण्डमा यस विद्यालयको सर्वाङ्गीण विकासका लागि सल्लाह-सुझाव सहित चल-अचल सम्पत्ति को योगदान गर्नुहुने दाता तथा दाता-परिवारहरु, (पूर्व विद्यार्थी साथीहरु, शिक्षक-शिक्षिका ज्युहरु, विद्यालय व्यवस्थापन समितिहरु) सम्पूर्णमा न्यानो नम्र नमस्कार! साथै ऐतिहासिक दस्तावेज, वर्तमान अवस्था र सुन्दर भविष्यको परिकल्पनाको सँगालो यस विद्यालयको वेबसाइटमा यहाँहरूलाई स्वागत छ ।
शिक्षा समाजको सर्वाङ्गीण विकासको मेरुदण्ड हो भने विद्यालय त्यसको माध्यम हो, जहाँ आजका बालबालिका भोलिका कर्णधारहरू जीवनको दोस्रो पाठशालाका रूपमा आफ्नो दैनिकीको एक-तिहाइ समय बिताइरहेका हुन्छन्। अतः विद्यालयीय शिक्षा औपचारिक मात्र नभई असल चरित्र, नैतिकवान्, अनुशासित, सामाजिक, व्यावहारिक, सिर्जनशील र जिम्मेवार नागरिक निर्माण गर्ने साझा थलो बन्नुपर्दछ। यसै उद्देश्य र विश्वासका साथ विद्यालयको भौतिक सुधार, प्रशासनिक चुस्तता, शैक्षिक गुणस्तर, पारदर्शी व्यवस्थापन र समुदायसँगको सहकार्यलाई अझ मजबुत र सुदृढ बनाउन विद्यालय व्यवस्थापन समिति तन-मन-वचन र अधिकारले भ्याएसम्म लाग्ने प्रतिबद्धता जाहेर गर्दछ। साथै विद्यालयको चौतर्फी विकासमा यहाँहरूको रचनात्मक सुझाव तथा सहयोग सधैँ स्वागतयोग्य रहनेछ। ।"

"🌐 वेबसाइट शुभारम्भको अवसरमा शुभकामना सन्देश
सम्पूर्ण आदरणीय अभिभावक, प्यारा विद्यार्थी भाइबहिनीहरू, शिक्षक-कर्मचारी तथा शिक्षाप्रेमी महानुभावहरूमा हार्दिक नमस्कार! आजको यस ऐतिहासिक एवम् गौरवमय क्षणमा हाम्रा अभिभावक, विद्यार्थी तथा सम्पूर्ण समुदायलाई प्रविधिसँग जोड्ने उद्देश्यका साथ विद्यालयको आधिकारिक वेबसाइट शुभारम्भ गर्न पाउँदा म अत्यन्तै हर्षित र गौरवान्वित महसुस गरिरहेको छु। वर्तमान प्रविधिको युगमा डिजिटल माध्यमलाई शिक्षाको प्रभावकारी सेतुका रूपमा अगाडि बढाउनुपर्छ भन्ने सोच, हुटहुटी र निरन्तरको प्राविधिक प्रयासबाट यो वेबसाइटको परिकल्पना साकार भएको हो। शिक्षण पेसासँगै प्रविधिलाई पछ्याउँदै आफ्नै हातले तयार पारेको यो डिजिटल प्लेटफर्म आज यहाँहरूसमक्ष प्रस्तुत गर्न पाउँदा मलाई विशेष आत्मसन्तुष्टि मिलेको छ। यो वेबसाइट केवल एक सूचनाको माध्यम मात्र नभई हाम्रो विद्यालयको समग्र शैक्षिक गतिविधि, भौतिक प्रगति, भर्ना तथा परीक्षा परिणाम, पाठ्यक्रम विवरण एवम् प्रशासनिक सूचनाहरू एकै ठाउँबाट सहजै प्राप्त गर्ने साझा थलो हो। प्रविधिको उच्चतम प्रयोग गरी विद्यालय र घरबीचको दूरी घटाउनुका साथै विद्यार्थीहरूलाई आधुनिक डिजिटल जगतसँग जोड्नु आजको आवश्यकता र हाम्रो दायित्व पनि हो। यस डिजिटल प्लेटफर्मले विद्यालय, विद्यार्थी, अभिभावक र सम्पूर्ण सरोकारवालाहरूबीचको सम्बन्धलाई थप पारदर्शी, मजबुत र जीवन्त बनाउनेछ भन्ने पूर्ण विश्वास लिएको छु।
💡 रचनात्मक सुझाव र प्रतिक्रियाको अपेक्षा यो वेबसाइटलाई अझ बढी उपयोगी, सहज र सूचनामूलक बनाउन यहाँहरूको रचनात्मक सुझाव, सल्लाह र प्रतिक्रियाको सधैँ स्वागत गरिनेछ। आफ्ना अमूल्य विचारहरू निर्धक्क भई साझा गरिदिनुहुन म सम्पूर्ण पाठकवर्गमा हार्दिक अनुरोध गर्दछु। अन्त्यमा, यस वेबसाइटको सोचलाई साकार पार्ने क्रममा प्राविधिक डिजाइन र कोडिङका हरेक चरणहरू पार गर्दै यहाँसम्म पुर्‍याउन प्रत्यक्ष वा अप्रत्यक्ष रूपमा हौसला र सहयोग पुर्‍याउनुहुने सम्पूर्ण शिक्षक-कर्मचारी, एवम् विद्यालय व्यवस्थापन समितिसमक्ष हार्दिक आभार प्रकट गर्दछु। ।"

"प्रिय विद्यार्थीहरू, आदरणीय अभिभावकज्यूहरू, सम्माननीय शिक्षक–शिक्षिका तथा विद्यालय परिवार, हाम्रो विद्यालयले गुणस्तरीय, व्यवहारिक र जीवनोपयोगी शिक्षामार्फत सक्षम, अनुशासित, नैतिक तथा जिम्मेवार नागरिक उत्पादन गर्ने लक्ष्यका साथ निरन्तर कार्य गर्दै आएको छ। यस अभियानमा शिक्षक, विद्यार्थी, अभिभावक तथा समुदायको सक्रिय सहयोग र सहभागिता अत्यन्त महत्वपूर्ण रहेको छ। विद्यार्थीहरूलाई सिर्जनशील, आत्मविश्वासी र जिम्मेवार बनाउन विद्यालयले शैक्षिक, अतिरिक्त तथा सहपाठ्यक्रियात्मक गतिविधिलाई समान महत्व दिएको छ। हामी सबै विद्यार्थीलाई नियमित अध्ययन, अनुशासन, परिश्रम र असल आचरण अपनाई आफ्नो उज्ज्वल भविष्य निर्माण गर्न प्रेरित गर्दछौँ। यस विद्यालयप्रति विश्वास र सहयोग गर्नुहुने सम्पूर्ण अभिभावक, शिक्षक–शिक्षिका, विद्यालय व्यवस्थापन समिति, शुभेच्छुक तथा सम्पूर्ण विद्यालय परिवारप्रति हार्दिक आभार व्यक्त गर्दछौँ। आगामी दिनमा समेत निरन्तर सहयोग र सद्भावबाट विद्यालयलाई अझ उत्कृष्ट शैक्षिक संस्थाको रूपमा विकास गर्न सफल हुने विश्वास लिएको छु। ।"